Bod yn Rhan o Ymchwil

Rwy’n falch iawn o gyflwyno’r rhifyn hwn o’r cylchlythyr, a thynnu sylw at gymaint o straeon i ysbrydoli am gyfranogiad a chymryd rhan o bob cwr o’r DU. Eleni, mae’r gymuned ymchwil wedi parhau ei hymdrechion i fynd i’r afael ag effaith COVID-19.

Dyma enghreifftiau o ddwy astudiaeth o’r fath: Treial PANORAMIC, sy’n cael ei arwain o Brifysgol Rhydychen ar safleoedd ledled y DU, a fydd yn profi triniaethau gwrthfeirysol newydd ar gyfer COVID-19 i helpu cleifion i aros gartref heb fod angen iddynt gael eu derbyn i’r ysbyty. Ac mae SIMPLIFY yn dreial newydd sy’n cael ei gynnal gan y Sefydliad Cenedlaethol dros Ymchwil Iechyd (NIHR) yn Lloegr ac Iechyd a Gofal Cymdeithasol Cymru, yn edrych ar brawf gwaed aml-ganser o’r enw Galleri. Mae gan y ddau y potensial i newid bywydau.

Mae erthygl ar anghydraddoldebau iechyd yn ein hatgoffa o’r angen i sicrhau bod pobl o bob cefndir yn cael y cyfle i gymryd rhan mewn gwaith ymchwil.

Mae Mike Bell hefyd yn tynnu sylw at thema cyfleoedd cynhwysol trwy bwysleisio pwysigrwydd cynnwys pobl ifanc mewn gwaith ymchwil i ordewdra yn ogystal ag oedolion mewn blog gydag Elizabeth (15 oed) a Maddie (16 oed) am eu profiad o gymryd rhan mewn astudiaeth ryngwladol.

Canfu arolwg NIHR eleni bod 93% o ymatebwyr a gymerodd ran mewn gwaith ymchwil yn teimlo bod ymchwilwyr yn eu gwerthfawrogi a hoffem annog pobl eraill i ymateb i’r her. 

Mewn blog arall, mae Jeremy Taylor, Cyfarwyddwr Llais y Cyhoedd NIHR, yn ein hysbysu am 5 ffordd y bydd gweithio gyda’r cyhoedd yn cael ei wella dros y misoedd nesaf yn NIHR.

Ceir digonedd o enghreifftiau o gymryd rhan a chyfranogiad o bob cwr o’r DU felly parhewch i ddarllen.

Edrychaf ymlaen at barhau ein taith yn 2022.

Dr Janice Bailie

Cyfarwyddwr Cynorthwyol, Is-adran Ymchwil a Datblygu Iechyd a Gofal Cymdeithasol, Asiantaeth Iechyd Cyhoeddus Gogledd Iwerddon

Lansio astudiaeth gwrthfeirysol COVID-19 ledled y DU gyfan

Mae ymchwilwyr ym Mhrifysgol Rhydychen – mewn partneriaeth â’r NIHR – yn ceisio dod o hyd i driniaethau COVID-19 diogel ac effeithiol i helpu pobl i wella gartref ac mae cyfle i chi helpu trwy ymuno ag astudiaeth flaenoriaeth genedlaethol o’r enw PANORAMIC.

Nod y treial yw dod o hyd i driniaethau gwrthfeirysol sy’n lleihau’r niferoedd sy’n cael eu derbyn i’r ysbyty ac yn cyflymu gwellhad pobl â COVID-19, sydd gartref ac yng nghyfnod cynnar yr haint. Molnupiravir (Lagevrio yw enw’r brand) fydd y driniaeth wrthfeirysol gyntaf i gael ei hymchwilio drwy’r treial.

Sut i gymryd rhan

I gymryd rhan, bydd angen i chi fod wedi cael prawf COVID-19 positif a bod yn dioddef symptomau COVID-19 a ddechreuodd yn ystod y pum diwrnod diwethaf. Mae angen hefyd i chi fod yn 50 oed neu’n hŷn, neu’n 18 oed neu’n hŷn a chyflwr iechyd isorweddol, fel asthma.

Gall cyfranogwyr cymwys ymuno ar-lein neu dros y ffôn o gysur eu cartrefi eu hunain. Byddwn yn anfon yr holl wybodaeth sydd ei hangen arnoch trwy negesydd yn syth i’ch cartref. Byddwch hefyd yn derbyn dyddiadur symptomau ac efallai y byddwch yn derbyn triniaeth i’w chymryd. 

Dysgwch fwy drwy fynd i Be Part of Research.

Astudiaeth prawf gwaed canfod cynnar aml-ganser yn cychwyn

Mae’r NIHR ac Ymchwil Iechyd a Gofal Cymru yn cefnogi astudiaeth newydd o’r enw SYMPLIFY a fydd yn ymchwilio i brawf canfod cynnar aml-ganser newydd o’r enw Galleri, ar gyfer cleifion â symptomau amhenodol a allai fod yn ganlyniad o ganser. Prawf gwaed yw Galleri sy’n gallu canfod dros 50 o wahanol fathau o ganser â chyfradd canlyniadau negyddol anghywir o lai nag 1 y cant. Os hoffech ddarganfod mwy a gweld a ydych yn gymwys i gymryd rhan, ewch i’r dudalen astudiaeth ar Bod yn Rhan o Ymchwil.

I ddysgu mwy ac i weld a ydych yn gymwys i gymryd rhan, ewch i wefan yr astudiaeth.

Astudiaeth iechyd meddwl yn cychwyn yn yr Alban

Mae prosiect ymchwil arloesol i ddeall yn well sut mae pobl sy’n byw gyda salwch meddwl difrifol, cymhleth a/neu barhaus yn dioddef stigma a gwahaniaethu wedi cychwyn yn yr Alban.

Niferoedd uchel o gyfranogwyr ymchwil yn credu bod ymchwilwyr yn gwerthfawrogi eu cyfraniad

Bob blwyddyn mae NIHR yn holi cyfranogwyr ymchwil am eu profiadau o gymryd rhan, i weld yr hyn yr ydym yn ei wneud yn dda ac i ddarganfod y meysydd lle gallwn wella. Mae canlyniadau o Arolwg Profiad Cyfranogwyr mewn Ymchwil Clinigol (PRES) NIHR yn 2020/21 yn dangos bod 93% o gyfranogwyr yn Lloegr yn teimlo bod yr ymchwilwyr a thimau astudiaethau yn gwerthfawrogi’r cyfraniad yr oeddent yn ei wneud at ymchwil trwy gymryd rhan.

Roedd 96% yn teimlo eu bod yn derbyn gwybodaeth ddigonol a byddai 94% yn mynd ymlaen i gymryd rhan mewn gwaith ymchwil eto. Darllenwch y canfyddiadau.

Diwrnod AIDS y Byd

I nodi Diwrnod AIDS y Byd ar 1 Rhagfyr, mae’r blog diweddaraf hwn yn ystyried yr hyn a gyflawnwyd hyd yma ac yn tynnu sylw at rywfaint o’r gwaith ymchwil presennol a ariennir ac a ddarperir gan yr NIHR yn Lloegr.

Ymchwil poen cefn

Mae un o bob chwe oedolyn yn y DU yn dioddef rhyw fath o boen cefn ond gall fod yn anodd gwneud diagnosis o’r achos, ac mewn llawer o achosion bydd yn gwella ar ei ben ei hun heb fod angen unrhyw ymyrraeth feddygol. Darllenwch am y mathau o waith ymchwil i boen cefn sy’n digwydd a sut y gallwch gymryd rhan.

Archwilio anghydraddoldebau iechyd

Yn ein blog, rydym yn siarad â’r Athro Clare Bambra o Ysgol Ymchwil Iechyd Cyhoeddus NIHR i ddarganfod pam mae disgwyliad oes yn wahanol mewn gwahanol rannau o Loegr ar draws y DU, ac i edrych ar yr hyn sy’n digwydd i helpu i fynd i’r afael ag anghydraddoldebau iechyd. 

Yng Nghymru, mae DECIPHer yn gwneud gwaith ymchwil gwella iechyd i wella iechyd y boblogaeth ac i leihau anghydraddoldebau iechyd. Yng Ngogledd Iwerddon, nod Rhwydwaith Treialon Ymyrraeth Gofal Iechyd Trawsffiniol yn Iwerddon (CHITIN)  yw mynd i’r afael ag anghydraddoldebau yn yr ardaloedd ar y ffin rhwng Gogledd Iwerddon ac Iwerddon trwy 11 o dreialon Ymyrraeth Gofal Iechyd trawsffiniol. Iechyd Cyhoeddus yr Alban yw asiantaeth genedlaethol flaenllaw yr Alban ar gyfer gwella ac amddiffyn iechyd a llesiant holl bobl yr Alban, gan gynnwys pwyslais ar leihau anghydraddoldebau iechyd.

Rhagor o fynediad at ganfyddiadau ymchwil i aelodau’r cyhoedd 

Ar ôl ymgysylltu helaeth a rhanddeiliaid, gan gynnwys y cyhoedd, mae’r NIHR wedi cyhoeddi polisi Mynediad Agored newydd. Bydd y polisi hwn yn cynyddu nifer yr erthyglau ymchwil NHIR sy’n cael eu cyhoeddi a mynediad agored ac yn ehangu’r ffyrdd y gall ymchwilwyr wneud eu herthyglau ymchwil ar gael yn fwy eang. Darllenwch fwy 

Camau nesaf NIHR ar gyfer gweithio gyda chleifion a’r cyhoedd

Mae NIHR wedi arwain y ffordd ers amser maith o ran gweithio mewn partneriaeth gyda chleifion a’r cyhoedd i wneud gwaith ymchwil ym maes iechyd a gofal cymdeithasol. Yn y blog hwn, mae Jeremy Taylor, Cyfarwyddwr Llais y Cyhoedd NIHR, yn amlygu sut yr ydym yn bwriadu gwella ein gwaith yn y maes hwn yn dilyn cyfres o weithdai gyda’r gymuned ymchwil a chyfranwyr cyhoeddus.